Gwarantu cyllid aml-flwyddyn, sy'n gysylltiedig â chwyddiant, ar gyfer gwasanaethau digartrefedd sy'n cynnwys:

• Clustnodi a chynyddu'r Grant Cymorth Tai i sicrhau ei fod yn parhau i fod yn gyllid wedi'u neilltuo sy'n ymateb i’r cynnydd blynyddol yn y Cyflog Byw Gwirioneddol

• Adnoddau pwrpasol ar gyfer cyflogau, hyfforddiant a datblygiad
  proffesiynol y gweithlu

Mae cylchoedd ariannu tymor byr heb gynnydd blynyddol yn tanseilio sefydlogrwydd gwasanaethau ac yn ei gwneud hi'n anodd cadw staff medrus, gyda gwasanaethau'n cael eu gorfodi i naill ai amsugno'r costau ychwanegol neu leihau'r ddarpariaeth, ac mae'r ddau beth hyn yn peryglu ansawdd gofal sy'n ystyriol o drawma.

Blaenoriaethu adnabod, atal ac ymyrryd yn fuan fel yr unig ffordd wirioneddol o roi terfyn ar ddigartrefedd:

• Cydnabod ysgolion fel mannau hanfodol ar gyfer sylwi ar arwyddion cynnar o drallod a'u cefnogi i weithredu fel ymatebwyr rheng flaen, gan fuddsoddi mewn modelau ymyrryd yn fuan profedig fel Upstream Cymru, sy'n cael effaith barhaol

• Ariannu gweithwyr plant a phobl ifanc sy'n cefnogi'r rhai yr effeithir arnynt gan gam-drin domestig i sicrhau atal ac ymyrryd yn fuan ac ymwybyddiaeth gynaliadwy - yn enwedig wrth nodi arwyddion cynnar o ymddygiadau niweidiol a thorri'r cylch cam-drin

Mae blaenoriaethu adnabod, atal ac ymyrryd yn fuan yn allweddol i roi terfyn ar ddigartrefedd. Mae'n lleihau'r pwysau ar wasanaethau cyhoeddus, yn gwella cyfleoedd bywyd i bobl ifanc a theuluoedd sy'n agored i niwed ac yn adeiladu cymunedau cryfach. Mae ymwreiddio cyfrifoldebau ymyrryd yn fuan mewn lleoliadau addysg yn galluogi cymorth amserol a chydweithredu. Mae gweithwyr plant a phobl ifanc sy'n cefnogi'r rhai yr effeithir arnynt gan gam-drin domestig yn ganolog i'r ymdrech hon.

Darparu cyllid parhaus ar gyfer rhaglenni addysg a chyflogadwyedd ôl-16 wedi'u teilwra I bobl ifanc niwroamrywiol a'r rhai ag anableddau neu anawsterau dysgu

Mae llawer o bobl ifanc yn methu aros mewn addysg brif ffrwd oherwydd anghenion nas diwallwyd, ac yn wynebu mwy o risg o gael eu gwahardd, o ddiweithdra ac o ddigartrefedd. Mae hyn yn arbennig o wir am bobl ifanc niwroamrywiol, sy'n cael eu cynrychioli'n anghymesur mewn ffigurau digartrefedd ymysg pobl ifanc.

Ei gwneud yn ofynnol I bob awdurdod lleol yng nghymru gasglu ac adrodd data ar ddigartrefedd ymysg pobl ifanc lhdtc+, ac ariannu gwasanaethau arbenigol, fel tŷ pride, ym mhob rhanbarth

Mae un o bob pedwar person ifanc sy'n profi digartrefedd yn uniaethu fel LHDTC+, ond mae prosesau casglu data yn anghyson. Mae gwasanaethau tai LHDTC+ pwrpasol yn darparu llety diogel ac amgylcheddau cadarnhaol lle gall pobl ifanc gael mynediad at gymorth wedi'i deilwra, ailadeiladu ymddiriedaeth a dechrau ffynnu - rhywbeth na all darpariaeth gyffredinol yn aml ei gynnig.